ذكريات ال 6 دقايق و 37 ثانية (أول انتخابات رئاسية)

انتخبت هيييييييييييييييييييييه
الصبح صحيت من النوم على تليفون أمل الساعة 8 الصبح بتقولى انها واقفة فى الطابور الطوييييييييييييييييييييييييل أوى ومستنية اللجنة تفتح
قولتلها ايه اللى موديكى بدرى أوى كده يابنتى ؟؟
قالت أهو اللى حصل
رغينا شوية واتريقنا كتير وبعدين اللجنة فتحت فسابتنى بقى وراحت تتنتخب
انا بعديها عمالة أقاوم فى نفسى اروح دلوقتى ولا اخر النهار
وفى الاخر رسيت على ان انا اكمل نوم :)
صحيت الساعة 11 ونص اروح انتخب بقى
ماما قالتلى هتروحى فى الحر ده
قولتلها ماهى هى دى النصاحة كل الناس هتقول كده وتقعد فى البيت وانزل انا انتخب لوحدى ... بس هو انا هنتخب فين؟؟
ماما قالتلى وكمان مش عارفة لجنتك اتنيلى
بعت رسالة بخمستاشر قرش ل 5151 وبعتولى رسالة غريبة جدا مكتوب فيها مدرسة الاعدادية بنات (ياحلاوة) وانا مش فاهمة اللى هى ايه بالظبط بس كان مكتوب برضه جنب القسم قولت أروح جنب القسم وهناك اتصرف
بس ياسيدى لبست  وخدت معايا ازازة مية محدش عارف الدنيا هناك عاملة ازاى وكنت بفكر أعممل سندوتشات بس قولت ف بالى أكيد مش هتوصل لمرحلة السندوتشات
نزلت ورحت هناك ركبت مواصلتين .. بس كله يهون عشان خاطر مصر
سألت فى الشارع فين مدرسة البنات الاعدادى واحد ظابط شرطة عسكرية (بيتهيألى انه) ابن حلال شاورلى عليها
المدرسة فاضيااااااااااااااااااااااااااااااااااااااااه خالص
ولا بنى آدم غير الحلوين بتوع الجيش والشرطة اللى بيأمنوا
قوم ايه الاقيلك واحد داخل قدامى ينتخب ومعاه بطة (اينعم بطة) .. المسكينة ماسكها من جناحاتها وداخل بيها ينتخب (والله احنا شعب زى العسل) وقدام شوية عند السلم لقيت اتنين عواجيز خالص خالص راجل وست ماشيين يتسندوا على بعض وهى بتقوله انتخب ابو الفتوح مش حد تانى يقولها ماشى استنى انتى بس هنا اطلع انتخب وانزل اوديكى لجنتك :)
وانا ع السلم واحدة سألتنى هتنتخبى مين؟؟ بكل براءة رديت أبو الفتوح بإذن الله
راحت بصالى من فوق لتحت آآآآه أبو الفتوح  .. بكل سذاجة برضه سألتها وحضرتك قالتلى عمرو موسى ... لا اراديا لقتنى بقولها ربنا يسامحك انتى واللى زيك عايزين تودو البلد ف داهية  وسبتها وطلعت
على باب اللجنة دورت على اسمى فى الكشف وبعدين لقيت طابور صغنن كده وقفت اخر واحدة وبعد دقيقة كده جت واحدة بتسأل على طابور لجنة 10 راحو الناس قالولها هنا .. وانا أقول هنا مين هى مش دى 11 قالتى واحدة 11 الفاضية اللى هناك دى انتى ايه اللى موقفك هنا
رحت بقى ع اللجنة الفاضية ودخلت لوسمحت هنا لجنة 11
-ايون انتى رقمك كام 

-3870
-المكتب اللى قدامك
رحت المكت التانى رقمك وبطاقتك قولتله الرقم ماطلعش اسمى .. من هنا لهنا وصلنا لأن انا أصلا رقم 3810
ماعلينا .. القاضى بيسأل وانتى بقى فى سنة كام؟؟
- تالتة اسنان ان شاء الله
- دا انا سنانى ....... (عيب دى أسرار عيانين) وهتفتحى فين بقى عشان أبقى اجى اكشف عندك
- انا لسه مقررتش بس حضرتك انا تحت امرك فى أى حاجة
وادانى الورقة ورحت ورا الستارة عشان انتخب .. قريت الفاتحة وسميت بالله وقرأت أسامى المرشحين .. مفيش غيره عبدالمنعم .. وصح جنب عبد المنعم والحمد لله بعديها وطبقت الورقة وحطيتها فى الصندوق
وانا خارجة بسألهم فين الحبر لقيت واحد واقف ع الباب بيقولى يلا حطى صباعك .. انا لا ارادى برضه مديت ايدى الشمال اللى كانت لسه ماسكة القلم وبتعلم .. ايدك اليمين يا أستاذة .. على فكرة انا شولة .. ايدك اليمين ياأستاذة (فكرنى بشوية الدكاترة اللى عندنا اللى أقولهم انا شولة يقولولى من يمين العيان يادكتورة) ما علينا اديته صبعى اليمين وانا بضحك وربنا يباركله غرقهولى كله حبر وقالى بااااااااااااااااس كفاية كده حلو اوى ... وانا خارجة سامعة الراجل اللى سألنى انتى ف سنة كام بيقول دى طب اسنان (مش عارفة دى شتيمة ولا ايه)
وبس خرجت من اللجنة
لقيت 3 رجالة كبار واقفين قدام صورة لمحمد مرسى وواحد بيقول ده محمد مرسى التانى بيرد عليه لأ ده عمرو موسى ... انا رحت رادة عليه ياجماعة ده عبد المنعم ابو الفتوح رمز الحصان :) :P:P
وروحت .... بس
سعيدة بممارسة الديموقراطية 

العسكر

النهاردة 10 رمضان مش اللى هو يوم العاشر من رمضان اللى عبر فيه جنود مصر البواسل خط بارليف ورفعوا راسنا وهما صايمين ((ربنا يجازيهم خير)) ودمهم سال بقى على الرمل زى ماشوفنا فى فيلم الرصاصة لاتزال فى جيبى .. النهاردة 10 رمضان اللى هو يوم التدوين ضد انتهاكات العسكر.
أنا بصراحة واحدة متأذتش من العسكر يعنى مانزلتش مظاهرة فى يوم وتضربت بالبيادة الميرى.
مكنتش فى التحرير أول يوم فى رمضان لما جم هدوا الخيام على الناس وضربوهم وسحلوهم وخلوهم يتحاموا فى الجامع ومع ذلك مارحموهمش.
انا مش واحد حامل اسمها ندى غنيم قالت للعسكرى أنا حامل راح ضاربها برجله فى بطنها.
انا اصلا كمان منزلتش الفطار فى أول جمعة فى رمضان عشان كده متضربتش ومتقالش عليا مخربة ولا حتى كان عندى نية للأعتصام.
أنا مشوفتش كل ده ومش هو ده اللى أنا هكتب عنه
اللى أنا شوفته بجد التليفزيون المصرى اللى أول خبر فى النشرة بتاعته "قام المشير طنطاوى ب..." أو "أشاد المشير طنطاوى ب...." بالظبط زى ماكان بيحصل أيام المخلوع واللى هيقول ده كلام فاضى هقوله هو ده المليان .. لما الأعلام بتاعنا يبقى همه الوحيد رضاء المجلس العسكرى يبقى احنا ماقومناش بثورة .. وكلنا فاكرين واقعة المذيعة دينا عبد الرحمن مع اللواء عبد المنعم كاطو الشهيرة اللى اتقلشت فيها المذيعة المحترمة من قناة دريم ... كمان طبعا سمعنا كلام اللواء المذكور على الكاتبة الصحفية المحترمة نجلاء بدير.
من رأيى ان العسكر انتهك الاعلام وخلانا نفقد ايماننا بالثورة 
وللحديث بقية...

الليبراليين والعلمانيين والشيوعيين

شوية ناس كده شايفين ان اللى احنا خدناه من الثورةهو الليبراليين الى هما أصلا علمانيين وامتداد للشيوعيين وأصلا دول كلهم على بعضهم شوية كفرة وملحدين ..
يقولولك شوف شوف عايزين المسلمة تتجوز مسيحى والشواذ يتجوزوا بعض .. عايزين يخربوها
والناس دى لا فاهمة يعنى ايه ليبرالى ولا علمانى ولا شيوعى بالنسبة ليهم كل دول واحد
والظريف بقى انه يوم الجمعة 29\7 كانو عمالين يقولو اسلامية اسلامية فيردوا عليهم مدنية مدنية (اللى هى دولة علمانية من وجهة نظرهم .. من الاخر دولة كفرة) والخمرة بقى هتغرق نهر النيل واللى هيشرب منه يتسطل البيوت تتقلب كباريهات
فبقى من وجهة نظر رجل الشارع ان الليبرالى ده شيطان رجيم
الليبراليين مش كفرة بس هما بيقولو شوية كلام ميركبش ان المفروض منجبرش ولادنا انهم يعتنقو ديننا ونسبهم هما يختاروا .. طيب ماحنا ممكن نعلمهم الدين من صغرهم عشان لما يكبروا يبقوا مقتنعين بيه
وبيقولو كمان الجواز المدنى جائز .. ماشى على عيننا وعلى راسنا بس انت عايز تعمل دولة مدنية بمرجعية دينية اللى هو الاسلام دين الاغلبية فحضرتك مضطر انك تحط قيود للجواز المدنى عشان يمشى مع مرجعيتك
ده لا ينفى مطلقا ان الشيوعين لا يؤمنون الا بالموجودات .. وان بعض العلمانيين ملحدين فعلا وان الليبرالين عايزين يحجموا دور الدين فى الدولة
شخصيا انا احترم الليبراليين جدا كرجال سياسة 
بس من فضلك ياسيدى الليبرالى متفتيش فى الدين عشان رجل الشارع مايقولش آدى اللى خدناه من الثورة ماهو فعلا هو ده اللى خدناه من الثورة

الأغانى والاعلانات والبرامج التافهة

من الحاجت اللى تقريبا هى أهم حاجة احنا خدناها من الثورة .. هى تفجير الابداع عند مؤلفين الاغانى ومخرجين الاعلانات ومقدمى البرامج التافهة ..
افتح كده التلفزيون على أى قناة .. اضرب أى رقم واستنى نص ساعة لو فى النص ساعة دى ماتعرضش قدامك أغنية للثورة (غالبا بتبقى لسه بكيسها من كترهم) أول مرة تشوفها يعنى وعلى الاقل اعلان برضه عن الثورة وحتة كده من برنامج او سيت كوم بيتريق بقى على أى حد بس أكيد هتلاقى ليه علاقة بالثورة ساعتها لازم تقول آدى اللى خدناه من الثورة

النخبة

بعد الثورة تردد مصطلح لطييييييييييف جدا اسمه النخبة 
مين دول ياعم؟؟ دول شوية ناس نضاف كده بيقروا كتير وفى منهم اللى معاه ماجستير ودكتوراه .. فى أى حاجة ((عديها دى))وبيطلعوا على التلفزيون كل يوم من 10 ل 12 فى برامج التوك شو عشان يحللو حال البلد .. وفى منهم اللى بيكتب فى الجرايد المحترمة 
وبس ياسيدى.
أنت كواحد من الناس العادية اللى بتنزل الصبح تروح شغلها وترجع تريح شوية وتروح تصلى العشا فى الجامع وبعدين ترجع تتعشى وانت بتتفرج على المسلسل التركى ... عمرك شفتهم فى الشارع؟؟
عمرك اتكلمت معاهم عرفت وجهة نظرهم أو عرفتهم وجه نظرك؟؟
طيب بيقولولك انهم بينزلوا ميدان التحرير أول رد هتقولهلهم مصر مش ميدان التحرير
ومش كل الناس بتتفرج على برامج التوك شو .. وفى ناس معندهاش تلفزيون أصلا
ممكن تصدق النخبة دى لو شفتهم ف يوم؟؟
طيب ممكن تقتنع بأى حاجة بيعملوها حتى لو كانت ثورة على الظلم والفساد؟؟
طيب لما يتضربوا فى الميدان مش أنت هتقول أحسن؟؟
وهتقول كمان آدى اللى خدناه من الثورة

السلفيين

من الحاجات اللطيفة قوى اللى احنا خدناها من الثورة ان احنا عرفنا يعنى ايه سلفيين
على حسب مابنشوف فى التلفزيون وعلى النت ويمكن كمان بنسمع فى الراديو ان الناس السلفيين دول شبه الكفار بتوع مكة ايام الاسلام الاولى .. ناس بيتعاملوا كده بعنف وغلظة مع كل الناس .. وزيادة تأكيد على ده راحوا نزلوا يوم 29\7 فى ميدان التحرير عشان يطبقوا شرع الله ((؟؟؟)) الميدان كان مليان ناس ملتحيين وكان أظرف تعليق سمعته "الميدان النهاردة كان بدقن" 
الناس دى مش وحشة ولا شريرة ولابياكلوا العيال الصغيرة بالليل .. ولا حتى هيقطعوا ايد اللى هيسرق ((ما أصل الشعب كله جعان))
بس طبعا تطبيق شرع الله ماكنش بالطريقة اللى هما عملوها دى وينزلوا الميدان يقولو الشعب يريد تطبيق شرع الله ((لو انت سلفى ومش عاجبك الكلام سيب المدونة وأطلع بره)) 
لما انتو ناس بتتقى الله كده سيبتوا ليه البلد توصل للحالة دى ماقولتوش لأ للفساد ليه وعلى فكرة انك تحارب الفساد ده اسمه جهاد فى سبيل الله؟؟
لما انتو ناس بتتقى الله كده مش بتشتغلوا ليه كويس وتدوروا عجلة الانتاج اللى خرموا وداننا بيها 
لما انتو ناس بتتقى الله كده سكتوا ليه على ضرب الناس أول يوم رمضان فى الميدان وهما صايمين لأ وسكتوا على دخول المسجد بالجزم؟؟
لما انتو ناس بتتقى الله كده ليه محدش سمعلكوا صوت اعتراض واحد على اللى بيحصل فى سوريا؟؟
وغيره وغيره وغيره ..
احنا فعلا عرفنا بعد الثورة يعنى ايه سلفى وآدى اللى خدناه من الثورة

آدى اللى خدناه من الثورة

حد كلمنى امبارح وقالى ان فى تدوين يوم 10 ضد المجلس العسكرى .. قولتله هندخل نشتم يعنى؟؟ .. قالى أه .. قولت قشطة (مع انى ماليش فى الشتيمة قوى) 

وبما انى حد ناصح قوى قولت أعمل بقى مدونة جديدة ومش باسمى عشان متقفشش (ماهو لازم يلمولهم كام واحد فى اليوم ده) وبما انى مؤمنة بنظرية ((يحدث للأخرين فقط)) بتاعت رفعت اسماعيل قولت على بركة الله نبدأ المدونة الجديدة
وقعدت أفكر فى اسمها كل مايجى ف بالى حاجة .. أقول لنفسى ماهو ده اللى خدناه من الثورة .. عشان كده بقت((آدى اللى خدناه من الثورة))